• Esta mañá celebrouse unha reunión na sede de Mariñas Coruñesas onde estiveron presentes concelleiros e concelleiras de Turismo destes municipios; técnicos da devandita área; Diego López, xerente do Plan de Sustentabilidade Turística da Reserva e as profesoras e investigadoras da Universidade dá Coruña Iria Caamaño, Mavi Lezcano e Antonia Pérez.
• A nova ferramenta irase implantando paulatinamente co persoal dos Concellos, que irán recibindo formación e tutorización para que a medio prazo sexa unha realidade.
A Reserva de Biosfera senta as bases para a creación da primeira plataforma interna de comunicación entre os axentes turísticos dos 17 concellos que a integran.
Por iso, a sede de Mariñas Coruñesas acolleu esta mañá unha reunión na que estiveron presentes concelleiras e concelleiros de Turismo dos municipios que a forman; técnicas e técnicos municipais da devandita área; Diego López, xerente do Plan de Sustentabilidade Turística da Reserva e as profesoras e investigadoras da Universidade da Coruña Iria Caamaño, Mavi Lezcano e Antonia Pérez.
O obxectivo baséase na necesidade de dar resposta ás necesidades comunicativas a nivel interno detectadas desde a Reserva de Biosfera, e en colaboración coa Facultade de Turismo da UDC, sendo Mariñas Coruñesas a entidade xestora do Primeiro Destino de Ecoturismo certificado de Galicia que procede á elaboración dun manual ‘(in)formativo’ para a xestión xeral e integrada das áreas de turismo dos 17 municipios que a integran.
“As Oficinas de Información Turística son un servizo esencial nos destinos e xogan un papel decisivo no sistema turístico, sendo na gran maioría de ocasións, o primeiro punto de contacto presencial co público visitante”, comentaba Diego López durante o encontro. “De feito, o seu funcionamento inflúe decisivamente no grao de satisfacción da experiencia do público e na súa fidelización, así como na promoción da oferta global”, proseguía.
Nesta liña, as Oficinas de Turismo foron adquirindo nos últimos anos maior recoñecemento e novas competencias que van máis aló de achegar mera información e, neste sentido, son as persoas que traballan na información turística as que deben fomentar o desenvolvemento local ao incentivar consumo de produtos, servizos e experiencias locais. Sen dúbida, a peza crave dun bo funcionamento dunha Oficina de Turismo.
Por tanto, e neste contecto, existe unha necesidade tanto por parte dos profesionais como da propia Reserva de Biosfera, de elaborar unha guía que recolla unha lista de tarefas que se deben asumir por parte dunha Oficina de Información Turística, así como establecer as ferramentas e procedementos para facilitar o seu labor e, por suposto, promover a comunicación e colaboración para traballar en rede entre todas as que se sitúan no territorio de Mariñas Coruñesas.
En definitiva, o camiño para seguir non é outro que presentar un manual dirixido ás e os profesionais que traballan nestes centros do territorio da Reserva de Biosfera para articular unha reorientación do modelo de xestión dos mesmos, así como ofrecer uns procedementos que permitan executar un sistema de información turística integrado que fomente un enfoque homoxéneo de contidos, imaxe, servizo ofrecido e recollida de datos.
A nova ferramenta irase implantando paulatinamente co persoal dos Concellos, que irán recibindo formación e tutorización para que a medio prazo sexa unha realidade.
Desde a Reserva de Biosfera queremos agradecer tanto a alta participación e representación da totalidade de municipios como á UDC, que contribúen sen dúbida a que aos poucos, cremos a base para ser un destino turístico de referencia.
